დახრა ზურგის ტკივილის გარეშე — რა ავირჩიოთ? ნაწილი II
კიდეების მოსაკეცი დაზგები
კიდეების მოსაკეც დაზგაზე ნაკეთობის ფორმირებისთვის, ოპერატორი (ან ავტომატური მოწყობილობა) ამზადებს სამუშაო ნაწილს უკანა საყრდენების მქონე სამუშაო ზედაპირზე, რომელსაც აქვს ჩაღრმავებაში მოთავსებული რელსები ინდივიდუალური მართვის მქონე ამწევი "თითებით".
ნამუშევარი გადაადგილდება წინ და თავსდება მომჭერებში, რომლებიც მას აფიქსირებენ. ბოლო წლებში კიდეების მოსაკეცი დაზგები ისე დაიხვეწა, რომ მათ შეუძლიათ იმუშაონ (მოკეცონ კიდეები) როგორც პოზიტიური, ასევე ნეგატიური მიმართულებით ერთი მოწყობილობის გამოყენებით.
ზოგჯერ სამუშაო ზედაპირი შეიძლება იყოს Г-ს ფორმის, ჰორიზონტალური ზოლით, რომელიც მოთავსებულია ხელსაწყოს უკან. დიდგაბარიტიან პანელებთან მუშაობისას ბევრი ოპერატორი ამჯობინებს დაზგის უკანა მხრიდან მუშაობას, და ასეთი ფორმის სამუშაო ზედაპირი მათ ეხმარება სამუშაო ნაწილის დაჭერაში ღუნვის ციკლის დროს.
მომჭერი მოწყობილობების სიმაღლე ძირითადად განსაზღვრავს სიმაღლის შეზღუდვებს 90-გრადუსიანი ფლანჟებისთვის ოთხმხრივ ყუთზე. თუ სამუშაო ნაწილს ფლანჟები აქვს მხოლოდ ერთ ან ორ მხარეს, სიმაღლეზე შეზღუდვები არ იქნება. მომჭერი მოწყობილობები შეიძლება შეიცვალოს და გადაკეთდეს ღუნვის სიგრძის მიხედვით, რათა თავიდან იქნას აცილებული შეჯახება ადრე მოკეცილ ფლანჟებთან.
მას შემდეგ, რაც სამუშაო ნაწილი დაფიქსირდება მომჭერებში, მოძრავ ჩარჩოზე არსებული ხელსაწყო ეხება მას და ღუნავს. ჩარჩოს შეუძლია იმოძრაოს 0.1 გრადუსის სიზუსტით, რაც ქმნის კუთხეს +/- ნახევარი გრადუსის ცდომილებით. სტანდარტული მოსაკეცი ხელსაწყო შეიძლება მოერგოს სხვადასხვა ვარიანტს და სხვადასხვა სისქის მასალების ღუნვისას მისი შეცვლა არ არის საჭირო.
დაზგების ზოგიერთ მოდელში უკანა საყრდენების მქონე სამუშაო ზედაპირის სიმაღლე რეგულირებადია, რაც ოპერატორებს ეხმარება სხვადასხვა ნაკეთობებთან მუშაობასა და ნეგატიური მიმართულებით ღუნვის შესრულებაში. სამუშაო ზედაპირი დაბლა იწევა ნეგატიური ღუნვის კუთხის კომპენსაციისთვის. კიდეების მოსაკეც დაზგებს ასევე შეუძლიათ ფურცლის კიდის სხვაგვარი გეომეტრიის ფორმირება. ოპერატორი ათავსებს სამუშაო ნაწილს ზედაპირზე და ხელსაწყო ეშვება, რაც ქმნის ბრტყელ, წვეთისებურ ან სხვა ფორმის კიდეს.
თანამედროვე კიდეების მოსაკეცი სისტემები ასრულებენ ღუნვას როგორც პოზიტიური, ასევე ნეგატიური მიმართულებით. ეს მიიღწევა ჩარჩოს ზევით და ქვევით გადაადგილებით. ქვევით დასაშვებად, იგი უნდა შემობრუნდეს გარეთა მხარეს ხელსაწყოს სიგანეზე. დავუშვათ, ხელსაწყოს სიგანეა 0.6 ინჩი.
ზედა მიმართულებით პირველი ღუნვის შესასრულებლად, ხელსაწყოს ზედა კიდე ეხება ფურცელს. ფურცლის ქვევით მოსაკეცად, ხელსაწყოს ქვედა კიდემ უნდა მოღუნოს მასალის ზედაპირი, რისთვისაც ჩარჩოს ბრუნვის ღერძი უნდა გადაადგილდეს 0.6 ინჩით.
უფრო დიდ ხელსაწყოებს შეუძლიათ იმუშაონ მეტი სისქის მასალებთან. თხელი ხელსაწყოები — მხოლოდ მცირე სისქისას, მაგრამ რადგან ისინი ვიწროა, მათ შეუძლიათ მიწვდნენ სამუშაო ნაწილის ისეთ ადგილებს, რომლებიც მიუწვდომელია დიდებისთვის, მაგალითად, ვიწრო კიდეების მქონე პირაპირა ღუნვისას.
ფურცლის მოსაკეც წნეხებზე ხელსაწყოს ავტომატური შეცვლა სულ უფრო პოპულარული ხდება და ბოლო წლებში ხელსაწყოს ავტომატური შეცვლა პანელების მოსაკეცი დაზგების ბაზარზეც გამოჩნდა. ასეთ დაზგებში რობოტიზებული მანიპულატორები ცვლიან და გადაადგილებენ მომჭერი კოჭის ხელსაწყოებს კონკრეტული ამოცანისთვის.
ზოგიერთ კიდეების მოსაკეც დაზგაზე ხელსაწყოს შეცვლა ავტომატურად ხდება ზედა ჩარჩოს ბრუნვის ხარჯზე. მის ერთ მხარეს არის ჩვეულებრივი მომჭერი ხელსაწყო, ხოლო მეორე მხარეს — სეგმენტური მომჭერი მოწყობილობები. ოპერატორს შეუძლია შეასრულოს საჭირო რაოდენობის ღუნვა ჩვეულებრივი ხელსაწყოთი, ხოლო მეორე მხარეს ჰქონდეს გამზადებული სეგმენტური მოწყობილობები სხვადასხვა სიგანის პანელებისა და სხვა მსგავსი სამუშაო ნაწილებისთვის.
მოსაკეცი წნეხების მსგავსად, კიდეების მოსაკეცი დაზგები ახლა აღჭურვილია ხელსაწყოს ავტომატური შეცვლის მოწყობილობებით, ოღონდ ამ შემთხვევაში იცვლება და მანიპულირდება მომჭერი მოწყობილობები, რაც ეხმარება ჩარჩოს სხვადასხვა სიგრძის გამოყენებასა და უკვე შესრულებულ ნაჭდევებთან და კიდეებთან შეჯახების თავიდან აცილებას.
კიდეების ღუნვის ტექნოლოგიაში ბევრი რამ შეიცვალა და ღუნვის ბევრი პრობლემა წარმატებით გადაიჭრა. ბაზარზე გამოჩნდა კიდეების ღუნვის სრულად ავტომატიზებული სისტემები ხელსაწყოს ავტომატური შეცვლითა და ნაკეთობების მანიპულაციით.
როგორც ადრე აღვნიშნეთ, წარმოებაში გამოყენებას პოულობს ღუნვის ნებისმიერი ტექნოლოგიური გადაწყვეტა — სპეციალიზებული ხელსაწყოებიდან დაწყებული, ავტომატური სისტემებითა და ერთმანეთთან დაკავშირებული დაზგების ჯაჭვებით დამთავრებული. კონკრეტულად რისი არჩევაა საჭირო, დამოკიდებულია წარმოების პოტენციალზე, დასამზადებელ პროდუქციასა და კლიენტურის სპეციფიკაზე. მიმართეთ Italian Machinery Association-ს, რათა შეარჩიოთ საუკეთესო ტექნოლოგიური გადაწყვეტა თქვენთვის და თქვენი ოპერატორებისთვის.
